Afritun viðtala, á þinni eigin tölvu

Allir sem hafa afritað viðtal í höndunum þekkja þetta: spóla til baka, hlusta aftur, skrifa þrjú orð, spóla aftur. Klukkustund af tali verður að mörgum klukkustundum af vinnu, og tilvitnunin sem þú þarft er alltaf einhvers staðar í miðjunni.

Sjálfvirk umritun styttir þetta mikið. En flestar þjónustur virka þannig að hljóðið er sent á netþjóna úti í heimi, og fæstar þeirra ráða vel við íslensku. Hearkeeper er smíðað til að leysa hvort tveggja.

Fyrir hverja?

Blaðafólk. Viðtal við heimildarmann getur sagt meira en textinn: röddin, talsmátinn og hljóðin í kring geta bent á hver talar. Samkvæmt lögum um fjölmiðla nr. 38/2011 (25. gr.) er starfsfólki skráðra fjölmiðla óheimilt að upplýsa hver heimildarmaður er hafi hann óskað nafnleyndar. Því færri sem hafa upptökuna undir höndum, því minni hætta á að hún leki.

Nemendur. Viðtöl eru hluti af mörgum lokaverkefnum og ritgerðum, í framhaldsskóla jafnt sem háskóla. Afritunin er oft sá hluti verksins sem tekur lengstan tíma.

Rannsakendur. Í eigindlegum rannsóknum þarf að afrita viðtöl áður en hægt er að kóða þau. Í samþykkisyfirlýsingum og gagnaáætlunum stendur yfirleitt hvar gögnin eru geymd og hverjir fá þau. Ef þar stendur að hljóðið fari ekki út fyrir rannsóknarhópinn gengur ekki að senda það í skýjaþjónustu. Í rannsóknum á heilbrigðissviði þarf auk þess leyfi vísindasiðanefndar eða siðanefndar heilbrigðisrannsókna áður en rannsókn hefst (lög nr. 44/2014, 12. gr.).

Hvað sem þú gerir skaltu fylgja reglum þíns vinnustaðar, skóla eða siðanefndar. Það sem hér stendur er almennt og ekki lögfræðiráðgjöf.

Hvernig Hearkeeper afritar viðtöl

Hearkeeper er forrit fyrir Makkann sem er ekki komið út. Það tekur upp, afritar og skrifar glósur, allt á tölvunni sjálfri.

Upptaka á staðnum eða á netinu. Hearkeeper tekur upp hljóðnemann þinn og hljóð tölvunnar beint á Makkanum. Það virkar fyrir viðtal á kaffihúsi eða skrifstofu og fyrir viðtal á Zoom, Google Meet, Microsoft Teams, Slack, Webex eða FaceTime. Enginn upptökuþjónn kemur inn í símtalið.

Umritun á Makkanum. Talgreiningin keyrir á tölvunni (whisper.cpp, hraðað með Metal). Rauntímatexti birtist um tveimur til fjórum sekúndum á eftir þeim sem talar. Þegar þú stöðvar upptökuna tekur lokayfirferð með Whisper large-v3 turbo við og greinir mælendur í sundur, svo spurningarnar þínar og svör viðmælandans eru aðgreind. Á Mac með Apple-örgjörva mældum við lokayfirferðina um tífalt hraðari en rauntíma.

Hljóðið fer hvergi. Ekkert fer af Makkanum nema þú tengir teymisþjón eða þinn eigin API-lykil. Ef þú tengir hvorugt er upptakan, uppskriftin og glósurnar á þínum eigin diski, og allt virkar án nets.

Íslenska, enska og allt þar á milli

Íslenskan er í fyrsta sæti. Hearkeeper er smíðað í Reykjavík og talgreiningin er stillt fyrir íslensku. Viðtöl sem flakka milli íslensku og ensku eru greind sjálfkrafa: ensku kaflarnir haldast á ensku og þeir íslensku á íslensku. Alls ræður Hearkeeper við 99 tungumál, sem kemur sér vel þegar viðmælandinn talar pólsku, spænsku eða annað mál. Nánar um það á síðunni um íslenska talgreiningu.

Tilvitnun upp á sekúndu

Sjálfvirk umritun er ekki gallalaus. Nöfn, mállýskur og fólk sem talar hvert ofan í annað geta ruglað hvaða kerfi sem er, og röng tilvitnun er verri en engin.

Þess vegna vísar hver lína í uppskriftinni á sekúnduna þegar hún var sögð. Þú smellir á línuna og upptakan spilast þaðan, svo þú getur borið orðin saman við hljóðið áður en þú birtir þau eða kóðar.

• Leit í öllum viðtölum í einu, í einni SQLite-skrá á þínum diski.
• Samantekt sem mállíkan á Makkanum skrifar, án API-lykils, þar sem hver lína vísar á sína sekúndu.
• Spurningar yfir mörg viðtöl, með svari sem vísar á staðinn í upptökunni.
• Útflutningur í Markdown, einfaldan texta sem öll ritvinnsluforrit og greiningartól geta opnað.

Viðmælandinn veit af upptökunni

Hearkeeper er ekki til að taka upp í laumi. Hver upptaka hefst á samþykkisskrefi: þú lest stutta tilkynningu upp, setur hana í spjallið eða hvort tveggja, og samþykkiskvittun er vistuð með upptökunni. Upptökustikan er alltaf á skjánum, sést í skjádeilingu og er ekki hægt að fela.

Samkvæmt fjarskiptalögum nr. 70/2022 (91. gr.) á sá sem vill hljóðrita símtal að segja viðmælanda sínum frá því í upphafi. Í viðtali passar samþykkisskrefið við spurninguna sem flestir spyrja hvort eð er: „Er í lagi að ég taki þetta upp?“

Þín gögn, þínar skrár

Hljóð og uppskriftir eru venjulegar skrár á þínum diski. Þú tekur afrit, dulkóðar og eyðir eins og þér hentar. Ef þú hefur aldrei tengt netþjón skilur eyðing á Makkanum ekkert eftir í skýinu. Á móti ber þú sjálf eða sjálfur ábyrgð á tölvunni: notaðu gott lykilorð, dulkóðun disksins og hugsaðu um hvert afritin fara.

Hvenær?

Hearkeeper kemur fyrst á Makkann (macOS 14.2 eða nýrra, Apple-örgjörvar og Intel) og á önnur stýrikerfi síðar. Hvað vefurinn geymir um þig sérðu á persónuverndarsíðunni.

Viltu afrita viðtöl án þess að hljóðið fari af tölvunni? Skráðu þig á biðlistann og við sendum þér póst þegar útgáfa er tilbúin.